Nalunaarasuartaateqarnermik allakkerinermillu suliffeqarfik tamarmi maanna Tusass-imik taaguuteqalerpoq  

Taaguut Tusass suliffeqarfiup oqaluttuassartaani takornartaanngilaq. Taaguut ukiut 20-t matuma siorna siullermeerluni saqqummerpoq oqaluussinernut immertakkanut kiffartuussissummut taaguutigitinneqarluni. Ukiuni kingullerni sullitatta kiffartuussissutit allat aamma taamatut taaguutillit ilikkarpaat. Tusass mobil, Tusass internet, Tusass Suliffeqarfinnut, Nunani allani tusass aammalu Tusass meeqqanut. Suliffeqarfiup tamarmi maanna taaguutigilerpaa Tusass.

”Kiffartuussissutini Tusassini naleqartitaraarput pisariitsunnguunissaat, paasiuminartuunissaat atuisunullu atoruminartuunissaat. Maanna tamanna suliffeqarfimmut tamarmut atugaalernissaa kissaatigaarput, taamaattumillu taaguut taanna nutaaq ullutsinnullu naleqqunnerusoq atulissaaq,” Tusassimut siulersuisuni siulittaasoq Stine Bosse oqarpoq erseqqissarlugulu: “Nunarsuarmi tamarmi paasissutissanut, pisiassanut, nioqqutinut, kiffartuussissutinut misigisassanullu ataatsimik toorsiinnarluta isernissarput naatsorsuutigilernikuuarput. Ungasissuseq siornatigut kilometerinut uuttorneqartartoq, maanna ullunut, minutsinut, sekundinut millisekundinullu uuttorneqartalerpoq.“ 

Tusassip periarfissaalersippai attaveqaatit tamatsinnit taamaattussaannartut isigineqartut ullumikkut pinngitsoorsinnaanngiusavitagut. Immitsinnut ungasikkaluarluta qanillisitsisartut.

Kristian Reinert Davidsen, Tusassip pisortaanera, ima ilassuteqarpoq: ”Tusass kalaallisut oqaaserineqarluartuuvoq, maani nunatsinni nunanilu allani taajuminartinneqarlunilu eqqaamajuminartinneqartoq. Taaguutaavoq tamatta nalunngisarput, maannalu nutaamik siammasinnerusumillu isumaqartinneqalersoq.”

Piffissaq nutaaq periusissiarlu nutaaq

Nutaamik atertaarnerup ilisarnaateqalernerullu takutiinnarpaa piffissap nutaap Kalaallit Nunaata digitalimut siunissaanik sammiveqartup Tusassimullu pissanganartorpassuarnik pilersaaruteqarfiusup aallartinnera.

Tusass 2024-p tungaanut ersarissumik periusissiaqarpoq, ilaatigut suliffeqarfiup nunamut tamarmut sullissisuuneranik qitiutitsisumik aammalu digitalip ineriartortinneqarneranut peqataanissamut kissaateqartunut tamanut imaqartumik. 

Tusassimi pisortaaneq Kristian Reinert Davidsen ima oqarpoq: ”Attaveqaqatigiinneq ataqatigiissaarinerlu eqqarsaatiginerullugit attaveqaatit pitsaanerusut sullitanullu misigisassat pitsaanerusut Tusassimi ukkatarineqassapput. Nioqqutinik pitsanngorsaajuarnerit akinillu appartitsisarnerit siunissami ingerlateqqinneqassapput.” 

”Tamakku saniatigut piujuartitsinermik tunngaveqarluni ingerlatsineq isumannaassuserlu qitiutinneqassapput, aningaasaliisarnerni Tusassimilu ulluinnarni ingerlatsinermi, tassami nunarsuup sinnera uatsinnut qaninnerulersinniarlugu – uagullu immitsinnut qaninnerulersinnissarput pillugu – sulivugut,” Tusassimi siulersuisuni siulittaasoq Stine Bosse naggasiivoq.

Suliffeqarfiup taaguutiminik allanngortitsinera una siulliunngilaq. Tusass suliffeqarfiuvoq ukiut 150-it missaannik sorlaqartoq, Tusassilu taaguutit 20-ssaraat. Suliffeqarfiup ilisarnaatai taaguutaanullu allagartat piffissami aggersumi taarsersorneqassapput.