Tusass Plussinni telefoni nammineq akisartulersinnaavara?

Ajoraluartumik Tusass Plus telefoni nammineq akisartulerneqarsinnaanngilaq.


Atuisuuffik (abonnement) sunaana?

1. 'Atuisuuffik' (abonnement) atuinissamut isumaqatigiissutaavoq killiligaanngitsumik atuinissamut pituttuisoq.

2. Atuisuuffik siullermeerluni akilerneqaraangami atuutilertarpoq.

3. Qaammatikkaartumik kortimiik ilanngaatinnikkut akilerneqartarpoq. TELE-POST-ip kortimiik aningaasanik ilanngaatsinneq isumagisarpaa.

4. Isumaqatigiissut qaqugukkulluunniit taamaatinneqarsinnaavoq.
- Qaammammi atuuttumi 20-at qaangertinnagu taamaatinneqassaaq qaammammi tulliuttumi atorumanngikkaanni. 20-ata kingorna atuisuuffik taamaatinniarlugu nalunaaraani qaammatip tullia akilerneqaqqaassaaq.


Sooruna Tusass Plus-itaarniarlunga CPR-nr. atortariaqariga?

Kinaassutsimik uppernarsaatitut aammattaaq akiligassaqarnermut misissuinermut CPR-nr. atortarparput.


Tusass Plus-era qanoq ilillunga atorunnaartissavara?

Tusass Plus-imik attartugaqarnerit unitsissinnaavat tusass.gl-ip iserfissaa qulaaniittoq iserfigalugu; "Atuisuuneq" toorlugu, taavalu "Oqaluussineq SMS-ernerlu & killeqanngitsut"-ip sanianiittoq attataasaq ikinneranut/qaminneranut tuugassaq toorlugu.

Tusass Plus-imik attartugaqarnerit qaammatip 20-a qaangertinnagu atorunnaarsikkukku unissaaq. Qaammatip 20-ata kingorna atorunnaarsikkukku qaammat ataaseq suli akiligassarissavat.


Inuussutissarsiummik ingerlatalittut Tusass Plus-isisinnaavunga?

Namminersortutut suliffeqarfiutilittut Tusass Plus pisiarisinnaanngilat. Naatsorsuutigaarput namminersorlutik suliffeqarfiutilinnut aaqqiissuteqassalluta 2017 qaangiutsinnagu.


Tusass mobilinut kiffartuussinermi atuisunut immikkut malitassat

Tusass mobilinut kiffartuussinermik atuisunut immikkut malitassat-ni novembarip aallaqqaataaniit 2017 allannguutissat

Tusass mobilinut kiffartuussinermik atuisunut immikkut malitassat - Decembari 2016

 

Imarisai:

Atuisunut malitassat atuuffiat.

Atuisunngornissamut piumasaqaatit.

Pisariaqartinneqartut.

TELE-p pilersuisussaatitaanera, tassunga atortut taakkulu atorsinnaaneri ilanngullugit

Akiliineq immiinerlu.

Kortit kodii aamma taamaatitsinerit.

Atuutilernera.

 

1. Atuisunut malitassat atuuffiat

Ingerlatseqatigiiffiup akuersissummik pigisaqarnera naapertorlugu TELE-mit neqeroorutigineqartunut “TELE Greenland A/S-ip kiffartuussineranut ingerlatsineranullu malitassaat nalinginnaasut – Inuussutissarsiutilinnut” aamma “TELE Greenland A/S-ip kiffartuussineranut ingerlatsineranullu malitassaat nalinginnaasut – Innuttaasunut” tapertatut malitassat tulliuttut atuupput. Malitassat imminnut akerleriippata, kiffartuussinernut malitassanit nalinginnaasunit immikkut malitassat salliutinneqassapput. TELE atassusiisartuuvoq, Tusassilu mobilinik kiffartuussinerulluni.

 

Nassuiaatit:

”TELE”: Atassusiisartuuvoq

”Tusass”: Nioqqutip taaguutaa

”Mobilinut kiffartuussineq”: Tusass mobilinut kiffartuussineq

”Nammineertumik akiliineq”: Nammineertumik akiliineq attartugaqarnermut aalajangersimasumik akiliutaavoq attartugallip akiliutaa nalunaarsugaq atorlugu ilanngaassinikkut

”Tusassimik Immiinermut konto”: Konto toqqarneqarsinnaasoq, siumoortumik akiliinissamut ikkunneqartartoq atorneqartartorlu attartugallip aningaasartuutai qaffassimappata, ass. nunami allamiitilluni roamingimut naatsorsuutiginngisamik aningaasartuutinut imaluunniit pisiap suunera aallaavigalugu kiffartuussissutinik pisinernut

”Immiineq”: Attartugalik Tusassimik Immiinermut kontokkut siumoortumik akiliigaangat.

”Nammineertumik Immiineq”: Sullissineq Tusassimik Immiinermut kontokkut toqqarneqarsinnaasoq, taamaalilluni siumoortumik Tusassimik Immiinermut kontomut akiliineq ingerlanneqassaaq akiliummi nammineertumik ilanngaassinikkut, imaasa aningaasat atorneqartussat killissaat allajangigaq qaangeraangassuk.

 

2. Atuisunngornissamut piumasaqaatit

Tusass mobilinut kiffartuussineq atussaguniuk atuisoq tusass.gl-ikkut attartortunngorteqqaassaaq.

Atuisoq attartortunngorniaruni minnerpaamik 18-iniliisimassaaq.

Quppernermi tusass.gl–imi imminut atuisunngortitsisoqarsinnaavoq, Tusassimik attartorfissaq toqqarsinnaallugu, Nammineertumik Akiliinermut attartortunngortissinnaalluni, cpr-inik paasissutissat pisariaqartinneqartut allattorsinnaallugit, attartukkamik allanngortitsilluni atuinerminillu malinnaasinnaalluni.

Tusassimik atuisut Nammineertumik Akiliinermut nalunaarutigisimasussaapput.

TELE-p Tusass atorlugu attaveqateqartarnera digitaliuvoq aammalu ingerlanneqartarluni SMS-ikkut aamma/imaluunniit e-mailikkut. Taamaattumik nutaamik e-mailitaarsimagaanni aammalu attartornermut tunngassutillit paasissutissat allat TELE-mut erngerluni nalunaarutigineqassapput. Tamanna aamma tusass.gl.-ikkut pissaaq.

 

Pisariaqartinneqartut

Kalaallit Nunaanni mobilinut sukkulluunniit attaveqarfiusinnaasut pillugit paasissutissat TELE-p nittartagaa www.tele.gl aqqutigalugu takuneqarsinnaapput, imaluunniit TELE-mut saaffiginninnikkut paasineqarsinnaallutik. Mobilinut kiffartuussivik sumiiffinni mobilinut attaveqarfiusinnaasuni taamaallaat atorneqarsinnaavoq.

Tusass mobilinut kiffartuussissutinik atuisoqarsinnaassappat, atuisumi terminalip atortui tamatumunnga atorsinnaasuunissaat, atuisullu atortuisa eqqortumik attavilerneqarsimanissaat pisariaqarpoq.

 

4. TELE-p pilersuisussaatitaanera, tassunga atortut taakkulu atorsinnaaffii ilanngullugit

4.a. Atortut taakkulu atorsinnaaffii

Attartugassatut toqqarneqartumut tunngatillugu TELE-p nioqqutai pillugit takussutissiami, atortut taakkulu atorsinnaaffii suut atuisup atorsinnaanerai takuneqarsinnaapput.

Atuisup akiliilluni mobil atorlugu TELE-p oqaluussisinnaanermut aamma mobildata-mut kiffartuussivianik atuisinnaaneranik, Tusassip periarfissippaa aammalu SMS-inik MMS-inillu nassiussisinnaatillugulu tigusisinnaatillugu. Taakkuninnga atuisinnaanissamut atuisup telefonia taamatut atorsinnaasariaqarpoq.

Tamatuma saniatigut Tusassip atuisoq pisiap suunera aallaavigalugu kiffartuussissutinik pisisinnaaneranik periarfissippaa, taakkulu tassaasinnaapput assit, sianertaatit imaluunniit unamminernut peqataanerit, aatsaalli Tusassimik Immiinermut konto aningaasanik naammattunik imaqarpat. Atuisup telefonimi taakkununnga atorsinnaanissaa nammineq akisussaaffigaa. Pisinerit allat assigalugit taamatuttaaq kiffartuussissutinik taakkuninnga pisineq atuisup akisussaaffigaa. Tamatumunnga atatillugu atuisup eqqumaffigisariaqarpaa, kiffartuussissutit akeqarmata atuisup atuinermut akigitinneqartut nalinginnaasut atorlugit akiliisarnerata saniatigut. Tusassip akia nalunaarutigineqassaaq kiffartuussissutip nittarsaanneqarneranut atasumik. Pisiap suunera aallaavigalugu kiffartuussissutit, TELE-mit namminermit imaluunniit mobilit imarisinnaasaannik nioqquteqartumit allamit nioqqutigineqarsinnaapput. Arlaat kinaluunniit nioqquteqartuugaluarpat kiffartuussissummut akiligassaq TELE-mit akileqquneqartarpoq.

Pisiap suunera aallaavigalugu kiffartuussissummik pisinermi, peqqissimisinnaanermut malittarisassanik allanik peqarsinnaanera atuisup taamatuttaaq eqqumaffigisariaqarpaa. Kiffartuussissutinut tamakkununnga atatillugu tamanna nalunaarutigineqassaaq.

 

4.b. Ingerlatsineq sukkassuserlu

Tusass mobilimut kiffartuussissutip teknikkikkut piginnaasai pissutaallutik attaveqatigiinnerup sukkassusaata allanngorarsinnaanera atuisup ilisimassavaa.

Tusass mobilinut kiffartuussissummut attaveqartitsisoqartarpoq sukkassuseq annertunerpaasussatut taaneqartoq atorlugu. Atuisut qanoq amerlatigisut mobilinut attaveqaammik/ napparummik ataatsimik ataatsikkut atuinersut (piginnaasap arlalinnit atorneqarnera) aammalu atuisup sumiinnera apeqqutaalluni, sukkassuseq allanngorarsinnaavoq. Tusass Mobilinut kiffartuussissutinut tamanut sukkassutsit, protokol overhead ilanngullugu, nalunaarneqarput.

Aaqqiinerit teknikkimik, aserfallatsaaliinermik, ingerlatsinermik isumannaallisaanermillu pissuteqartut imaluunniit oqartussaasunit piumasaqaatit naammassineqarnissaannut pisariaqartinneqartut pissutigalugit, Tusass mobilinut kiffartuussinermik atuinermi periarfissanik killilersuigallarsinnaanissamut, TELE imminut piginnaatippoq.

TELE aammattaaq imminut piginnaatippoq (atuisup TELE-mit taarsiiffigineqarnissamik piumasaqarfigisinnaanngisaanik, makku pissutigalugit):

Iserfissiani (proxies-it ilanngullugit) ammasoqarnersoq misissussallugu kiisalu atuisup atortuini e-mailserverinik (relays) atornerlunneqarsinnaasunik ammaanissamut.

E-mailit tigusat nassiussallu virus-iusinnaasutut, spam-iusinnaasutut imaluunniit phishing-iusin-naasutut nalilerneqartut ingerlaqqinnissaat itigartissallugit.

TELE-p internetimut kiffartuussivianut inuup allap attavia atornerlunneqartutut nalilerneqarpat, soorlu virusinik, spam-inik imaluunniit phishing-inik siaruarterinernut, taassuma matunissaanut.

Piffissap ataatsip iluani SMS-it, MMS-it, e-mailit il.il. amerlassusaannik killiliinissamut.

Pisariaqartitsineq naapertorlugu attaveqaammik atortunillu allanik piorsaanissamut.

 

4.c. Atuisup interneternermini akisussaaffeqarnera

Atuisup internetimi iserfigisinnaasai TELE-mit akisussaaffigineqanngillat. Internetimik atuinerup kingunerisinnaavaa, atuisup hardwareani softwareaniluunniit viruseqalerneq aamma/ imaluunniit softwarenik allanik ajoqusiisinnaasunik peqalerneq. TELE tamakkununnga sunniuteqarsinnaanngilaq, taamaattumillu ajoqusiussinnaasunut aamma/ imaluunniit ajoqusiuttut kingunerisaannik annaasaqarnernut akisussaatinneqarsinnaanani.

 

4.d. Normunik paasiniaavimmi paasissutissat

Atuisup kissaatigissappagu, mobiltelefonip normua normunik paasiniaavimmit aamma TELE-p internetimi normunik paasiniaanermut kiffartuussineranit paasissutissiissutigineqarsinnaavoq.

Atuisup mobiliata normua ajornartoornermi telefonimut 112-imut atatillugu qaqugukkulluunniit politiinut aammalu attaveqaateqarnermik kiffartuussisunut allanut oqaatigineqassaaq, tamanna kalerrisaarinissamut atasumik pisariaqartinneqassappat.

 

5. Akiliisarneq immiisarnerlu

5.a. Akiliisitsisarneq

Tusassip ataani kiffartuussinermut akit TELE-mit aalajangersorneqartarput Naalakkersuisuniillu akuerineqartarlutik malittarisassat atuuttut taakkununnga tunngasut naapertorlugit. Ataatsimoortitat akii, akit akitsuutillu atuuttut paasissutissartaat nittartakkami www.tusass.gl–imi takuneqarsinnaapput.

 

5.b. Attartukkamut akiliineq

Attartukkamut akiliineq siumoortumik akilerneqartarpoq aammalu taamaallaat akiliisoqartarluni www.tusass.gl aqqutigalugu. Attartukkamut akitsuutinik immiinernulluunniit allatut ittunut akiliisoqarneri tamaasa TELE  uppernarsaammik SMS-ikkut aamma/ imaluunniit mailikkut nassiussisassaaq.

Atuisoq Nammineertumik Akiliineq-mut nalunaarutigisimassaaq. Nammineertumik Akiliineq-mut nalunaarutiginermi atuisup TELE pisinnaatippaa akiliinermut kortiminut paasissutissaatiminik toqqorsisinnaaneranik, taakkulu atorneqartussaapput atuisup akiliinermut kortia atorlugu Tusassimut attartortuunermut akiliummik akiliinermut.

Nammineertumik Akiliineq aalajangersimasumik isumaqatigiissutitut atuuppoq, tassa aningaasat qaammatip naaneri tamaasa atuisup akiliinermut kortianit ilanngaatigineqartarput.

Nammineertumik Akiliineq pisinnaanngikkaangat, ass. akiliinermut atuisup kortia matuneqarsimappat imaluunniit atuuffissaa naasimappat, kortiluunniit imaqanngippat, tamanna pillugu atuisut e-mailitut nalunaarutigisimasaanut aamma SMS-ikkut ilisimatitsissuteqartoqassaaq. Tamatumunnga  akiliuteqartitsinissamik TELE imminut pisinnaatippoq.

Atuisup Tusassimik Immiinermut kontomi akiliisarsimanini, nuussinerit aamma aningaasat qassiunerat qaqugukkulluunniit www.tusass.gl-imi takusinnaassavai. Akiliisimanngikkaanni Tusassimut isertoqarsinnaanngilaq qaammammi tulliuttumi. Tusassimik sullissinernut akiligassanik atuisimanernulluunniit paasissutissaliornernik nassiussisoqarneq ajorpoq.

 

5.c. Attartugaq atunngitsuugaq

Tusassimik attartugaqarneq atunngitsuugaq aningaasanik utertitsissutaaneq ajorpoq (tamakkiisumik ilaannakortumilluunniit), soorlumi aamma attartorneq atorneqanngitsoortoq piffissamut nutaamut nuunneqarsinnaanngitsoq.

 

5.d. Attartukkamik taarsiineq

Atuisoq attartukkamut akisunermut nuuppat, allannguineq erngerluni suliarineqartarpoq. Atuisoq attartukkamut taamatulli akilimmut akikinnermulluunniit nuuppat, allannguineq aammalu attartukkamut akiliut qaammatit tulliuttut nikinneranni akiligassanngorlugu suliarineqassaaq.

Tusassimik attartornerup imarisai Kalaallit Nunaanni atugassiaapput nunanilu allani atorneqarsinnaanatik, tak. imm. 5.h.

 

5.e. Attartornerup akianik akiliinngitsoortoqartillugu

Atuisup akiliinermut kortianit akiliinissaq matussuserneqarsinnaanngippat, attartornermut akiliut atuisup “Tusassimik Immiinermut konto”-aniit ilanngaatigineqarsinnaavoq – tamanna pillugu ersarinnerusumik atuarit imm. 5.g-mi. Akiliinngitsoortoqartillugu avammut sianersinnaajunnaarsitsinissamik (taamaattoq normu akeqanngitsumik sianerfigineqarsinnaasut soorlu 112 il.il. minillugit) kiisalu sukkassutsip 64 kbps-inut appartinnissaanut TELE pisinnaatippoq. Naak akiliisoqarsimanngikkaluartoq sianerfigineqarsinnaaneq suli periarfissaassaaq. Attartorneq atorsinnaanngoqqissaaq attartornermut akiliummik tullianik akiliisoqarneratigut.

Qaammatini tulleriinni 12-ini attartornermut akiliisoqarsimanngippat, attartorneq matuneqassaaq. Matusinissaq ullunik 30-nik sioqqullugu attartortoq SMS-ikkut siumut kalerrinneqassaaq.

 

5.f. Attartukkap avataatigut atuisoqartillugu

Oqaluussinerit

Tusassimik attartornermi oqaluussisinnaanermut tapiliussaq, Kalaallit Nunaanni telefoninut nalinginnaasunut aammalu mobiltelefoninut TELE-p normorititaanut taamaallaat atuuppoq. Oqaluussisinnaanerup imarisai normunut immikkut akeqartinneqartunut, soorlu normunut 90-iniit aallartittunut kiffartuussinernulluunniit allanut (soorlu normunik paasiniaanernut) atorneqarsinnaanngillat. Oqaluussisinnaanermut tapiliussaq nunanut allanut aamma nunanit allaniit sianernernut – tassa roamingimut – atorneqarsinnaanngilaq. Kiffartuussinernut immikkut akeqartinneqartunut aammalu pisiap suunera aallaavigalugu kiffartuussissutinut akeqartitsinerit TELE-p akii nalinginnaasut malippaat aammalu Tusassimik Immiinermut kontomut aningaasanik imalimmut attavilersimanissaq pisariaqartillugu, takuuk imm. 5.g.

 

Mobildata

Tusassimik attartornermi mobildata tapiliussaq TELE-p angallattakkanut attaveqaataani atuinernut taamaallaat atuuppoq. Atuisup mobildata-mik atuinerata attartornermut tapiliussat sinnerpagit, atuisup nassiussinerut aallernernullu sukkassuseq atugaa TELE-p nammineertumik 64 kbps-inut appartissavaa qaammatip tulliup aallartinnissaata tungaanut imaluunniit atuisup attartukkami ataatsimoortunut imaqqortunerusunut qaffatsinnissaata tungaanut. Atuisup qaammammi data tapiliussaq tamarmiusoq atoreersimagaluarpaguluunniit, www.tusass.gl qaqugukkulluunniit iserfigineqarsinnaajuassaaq. Nunami allamiitilluni atuineq akit qaqugukkulluunniit atuuttut www.tusass.gl–imi takuneqarsinnaasut malillugit akeqartinneqassaaq aammalu Tusassimik Immiinermut kontomut aningaasanik imalimmut attavilersimanissaq pisariaqartillugu, takuuk imm. 5.g.

Atuisup datanik nassiussinerinut aamma/ imaluunniit tigusaqarnerinut datat atuigai 10 KB-inngorlutik aallartinneri tamaasa naatsorsorneqalersarput.

 

SMS/MMS

Attartornermut tapiliussaapput killilersugaanngitsumik SMS-erneq aamma MMS-erneq. SMS-erneq aamma MMS-erneq killilersugaanngitsoq TELE-p angallattakkanut attaveqaataani Kalaallit Nunaanni mobilnormunut tamanut nalinginnaasunut atorneqarsinnaapput.

SMS-erneq aamma MMS-erneq killilersugaanngitsoq ukunani atuutinngilaq:

SMS imaluunniit MMS aqqutigalugit pisiap suunera aallaavigalugu kiffartuussissutit

SMS-it aamma MMS-it nunanit allaniit nassiunneqartut.

Web SMS aamma MMS.

Sullissisunut allanut, soorlu nunat allat mobilnormuinut, SMS-it aamma MMS-it.

Akit atuuttut malillugit taakku akeqartinneqarput.

SMS-it nunani allaniitilluni nassiunneqartut www.tusass.gl.-imi roaminginut allattukkat malillugit akeqartinneqarput.  

Pisiap suunera aallaavigalugu akeqartinneqartut SMS-it (ass. aningaasanik tunissuteqarnerit) aki qaqugukkulluunniit taaneqartoq akigaa. SMS-it taamatut ittut akeqannginnerannik tamanna isumaqanngilaq, naak atuisoq killeqanngitsumik atuisinnaagaluartoq. Assersuutigalugu aningaasanik katersiniarnermut aningaasanik tunisisoqarpat, SMS-ikkut nalunaarut kisimi akeqassanngilaq. Aningaasat tunniussat atuisup Tusassimik Immiinermut kontoanit immikkoortillugu ilanngaatigineqassaaq. SMS aqqutigalugu aningaasanik tunisinerup taamaattumik pisariaqartippaa, atuisup Tusassimik Immiinermut kontomut aningaasanik imalimmut attavilersimanissaa.

 

Atornerluineq:

SMS-it aamma MMS-it:

Maskinamit pilersitaassanngillat (maskina atorlugu nassiunneqarsimassanngillat) – Kalerrisaarutit tassani pineqanngillat

SMS-itut aamma MMS-itut assigiittut tigusisussamut ataatsimut malittuinnarmik nassiussuunneqassanngillat

Inummut ataatsimut eqimattanulluunniit ajoqusersaarinertut spamitulluunniit atorneqassanngillat

Aningaasannanniutitut atorneqassanngillat, soorlu piseqqusaarutinut.

Atornerluisoqartillugu atuisup attartornera TELE-p erngerluni atuutilersumik matusinnaavaa.

 

5.g. Pisiap suunera aallaavigalugu telefonit normuinut sianernernut, nunanut allanut sianernernut aammalu roamingimut atugassatut Tusassimik Immiinermut kontomut atuisunngornissamut nalunaarutigineq

Angallattakkanut kiffartuussinerit atuisup attartugaanut ilaanngitsut, Tusassimik Immiinermut kontotaarnikkut taassumalu siumoortumik akilerneratigut pisiarineqarsinnaapput. Atuisup kingullermik akiliineraninngaanniit konto qaammatini 12-ini atorsinnaavoq. Tusassimik Immiinermut kontop imai atuisumut utertinneqarsinnaapput utertitsinermut TELE-p akitsuusissaa qaqugukkulluunniit atuuttup ilanngullugu akilerneratigut.

Tusassimik Immiinermut konto roamingimut, nunamut allamut sianernermut aammalu normunut immikkut ittunut allanullu pisiap suunera aallaavigalugu kiffartuussissutinut atorneqarsinnaavoq. Atuisup Tusassimut Immiinermut kontoni pisariaqartitsilernermigut www.tusass.gl.-ikkut immersinnaavaa. Aningaasat atuisup akiliinernut kortianit ilanngaatigineqassapput, tamatumalu kingorna atuisoq akiliisimanerminut uppernarsaammik SMS-ikkut aammalu e-mail adressimigut uppernarsaammik nalunaarutisissaaq.

Atuisup tamanna nammineq kissaatigiguniuk, www.tusass.gl-ikkut Nammineetumik Immiinermut atuisunngortissinnaavoq (ass. nunami allamiitilluni roamingimut atorneqartussanut). Nammineetumik Immiineq pisarpoq, kontop imaasa atuisup aningaasanut killiunneqartut ilaasa killiliunneqartoq angugaangassuk. Atuisup aningaasat qaqugukkulluunniit allanngortissinnaavai, taakkulu nammineertumik Tusassimik Immiinermut kontomut akilerneqartarput.

Akiliutitut nalunaarutigineqartoq korti imaqanngikkaangat, atuisup Tusassimik Immiinermut kontoata imai attartornermut akiliutitut atornissaannik TELE pisinnaatippoq, takuuk imm. 5.e – ”Attartornerup akianik akiliinngitsoortoqartillugu”.

Atuisup attartukkani allanngortikkusuppagu imaluunniit matujumappagu, Tusassimillu Immiinermut kontoa imaqarpat, akitsuummik akiliuteqarneratigut aningaasat atuisup akiliinermut kortianut utertinneqarsinnaapput. Suliamut tassunga akitsuusiineq www.tusass.gl-imi takuneqarsinnaavoq.

Akiliineq naammassineqarsinnaanngikkaangat, attusioq SMS imaluunniit e-mail aqqutigalugit paasissutissinneqassaaq.

 

5.h. Nunap allap attaveqaataanik atuineq (roaming)

TELE-p nunani allani attaveqaatinik ingerlatseqatigiiffik isumaqatigiissuteqarfigisimappagu, atuisup nunami allami attaveqaatinik sullissisup attaveqaatai atorsinnaavai (roaming). Ingerlatseqatigiiffinnik sorlernik TELE isumaqatigiissusiorsimanera pillugu nalunaarsugaq nutartertuagaq www.tusass.gl-imi takuneqarsinnaavoq. Roamingimut atasumik attaveqaatip atorsinnaaffianut isersinnaanermullu il.il. tunngasunut TELE akisussaaffeqanngilaq.

Nunat allat angallattakkanut attaveqaataanni Tusassimik atuinermi aki, TELE-p attaveqaataanik atuinermi akinit allaanerunera atuisup eqqumaffigissavaa.

Tusass atorlugu roamingimik atuinermut Tusassimik Immiinermut kontomut attavilersimanissaq pisariaqarpoq – takuuk imm. 5.g.

Nunani allaniitilluni oqaluussinernut aammalu nunami allamiitilluni sianertumik tigusinernut roamingimut aningaasartuutit atuutiinnarput. Datanut tunngatillugu Mbytes-inut nassiussanut tigusanullu atuinerit atuutiinnarput.

 

6. Korti, kodit atorunnaarsitsinerlu

6.a. Korti kodillu

Atuisup Tusass atorsinnaassaguniuk TELE SIM-korteqartariaqarpoq. Atuisoq TELE-mi atuisooreersimaguni, SIM-korti pigeriikkani amerlanertigut atorsinnaavaa. Aatsaat atuisunngorsimaguni atuisup nioqqut Tusassimik ataatsimoortitanik imalik pisiareqqaassavaa, taanna SIM-kortimik imaqarpoq kodinik isertuussanik marlunnik imalik, tassalu Personal Identification Number (PIN-kodi) ataaseq aamma Personal Unblocking Key (PUK-kodi) ataaseq pissarsiarissavai. PIN- aamma PUK-kodi SIM-kortip allanit atornerlunneqarsinnaaneranut illersuutitut atuupput. SIM-korti, PIN-kodi aamma PUK-kodi atuisup kisimi susassarai, isumannaatsumillu toqqortarineqassapput.

PIN-kodit, PUK-kodit kodillu allat TELE-mit atugassanngorneqartut TELE-p pigisarai, aammalu atuisuunerup uninnerani utertinneqartussatut isigineqarlutik. PIN-kodi tulleriiginnarnik pingasoriarluni kukkusumik toortarneqaraangat, SIM-korti nammineertumik matuneqartarpoq, kingornagullu PUK-kodi atorlugu aatsaat ammarneqarsinnaasarluni. PUK-kodi tulleriiginnarnik qulinik kukkusumik toortarneqaraangat SIM-korti matuneqavittarpoq.

Atuisup PIN-kodini imaluunniit PUK-kodini tammarsimagunigit, taakku www.tusass.gl-imi takusinnaavai.

Atuisup kodiinik aamma SIM-kortianik allat atornerluinerat atuisup nammineq akisussaaffigaa.  Atornerluisoqarsimappat, kodit tammarsimappata imaluunniit allap PIN-kodi paasisassarinagu paasisimappagu, atuisup erngerluni TELE ilisimatissavaa, taamaalilluni annerusumik atuisoqalertinnagu TELE mattussisinnaaqqullugu.

Atuisoq SIM-kortimik nutaamik pisisinnaavoq, SIM-korti nutaanngitsoq tammarneqarsimappat atorsinnaajunnaarsimappalluunniit. Tamatuma kingorna SIM-korti nutaaq atuisup www.tusass.gl–imut nalunaarsussavaa.

SIM-korti tammarneqarsimappat atuisup TELE tamanna pillugu erngerluni ilisimatissavaa.

 

6.b. Atorunnaarsitsineq

Tusassimik attartorneq atuuttarpoq:

attartornerup atorunnaarsinneqarnissaata tungaanut

atuisup attartukkaminik qaammatini tulleriiginnarni 12-ini attartukkani akilersimanngikkaangagu, tak. imm. 5.e.

 

7. Atuutilerfia

Tusassimik kiffartuussinermut atuisunut malitassat uku Naalakkersuisunit akuerineqarput atuutilerlutillu 2016-imi decembarip aallaqqaataani.


Suna novembarip aallaqqaataaniit 2017-imi ´Tusass mobilinut kiffartuussinermi atuisunut immikkut malitassat´-ni allanngussava?

Atuisutut malitassat atuuffiata ataani nassuiaatit marluk ilanngupput:

”Qaffaaneq”: Atuisuuffik akisunerusumik taarserlugu

”Appaaneq”: Atuisuuffik akikinnerusumik taarserlugu

 

Aamma immikkoortup 5.d. ataani allannguut:

5.d. Atuisuuffimmik taarsiineq

Qaffaaneq:

Atuisup atuisuuffini akisunermut qaffakkuniuk, allannguineq erngerluni atuutilissaaq.

 

Appaaneq:

Atuisup atuisuuffini qaammami kigusinnerpaamik 20-at nallertinnagu akikinnermut apparuniuk, allannguineq qaammat tulliuttoq aallarnerfigalugu atuutilissaaq.

Atuisup atuisuuffini qaammami 20-iata kingorna akikinnermut apparuniuk, allannguineq qaammatip tulliata naareernerata kingorna aatsaat atuutilissaaq.

Atuisup atuisuuffini qaffassimaguniuk, atuisup tamatuma kingorna atuisuuffini qaammammi tassani apparsinnaanngilaa, soorlumi aamma atuisunngoqqaarnermi kingorna qaammammi tassani atuisuuffini apparsinnaanngikkaa.


Allannguutit toqqammavingalugit atuisuuffiit unitsikkusukkukku Iserit aqqutigalugu taamaaliorsinnaavutit.


Qaqugukkut atuisutut isumaqatigiissutiga allanngortissinnaavara?

Tusass Plusimut nuunneq mobildatamillu qaffaaneq qaqugukkulluunniit pisinnaavoq.

Tusass Plusimiit Tusassimut naliginnaasumut nuunneq aamma mobildatamik appaaneq, qaammammi atuuttumi ulloq 20-at qaangertinnagu isumagineqartariaqarpoq, qaammatip tulliani allannguutit atuutsilerniaraanni.


Tusass Plus-ip akilinngitsoornera

Tusass Plusinnut qaammammut akiliutaasartoq akilerteriaraluarparput. Akiliinngitsoorneq makkuninnga pissuteqarsinnaavoq:

- Korti akiliutigisartakkat allanngorsimavoq – kortippit paasissutissartai nutartikkit

- Korti matuneqarsimavoq – bankit attavigiuk

- Korti akiliinissamut aningaasanik naammattunik imaqanngilaq

 

Tusass Plus-imut atuisuuffiit aamma akilersinnaavat Tusass kontut naammattunik imaqarpat. Maana nittartakkatigut Tusass kontut aamma immersinnaavat imaluunniit pisiniarfinni Tusass-eriarlutit immersinnaavat.

 

Atuisuuffiit akilinngikkukku makkua kinguneqaataassapput:

- Tusass Plus-imut atuisuuffiit akilertinnagu sianersinnaanngilatit, sms-ersinnaanngilatit internet-sersinnaanalluunniit (Tusass kontut imaqaraluarpalluunniit).

- Sianerfigineqarsinnaavutit SMS-inillu nassiussivigineqarsinnaallutit. Normunut immikkut ittunut akeqanngitsunullu sianersinnaajuaannarputit aamma.

- Tusass Plus-imik atusuuffiit mikinerulertinniarukku imaluunniit Tusass-inngortinniarukku, allannguinerit ingerlaannaq atuutilernavianngilaq - allannguineq atugassarititatut isumaqatigiissutit malillugit pissaaq – ”Ikiu”-mi paasissutissat annertunerusut takukkit.

- Atuisuuffinnut tamakkiisumik akiliissaatit qaammammi atuuttumi kingusinnerusukkut atuisuuffiit akileraluarukkuluunniit.

- Akiliiguit nalunaarummik tigusissaatit, taassuma kingorna naliginnaasumik Tusass Plus-it atorsinnaanngoqqissavat. 


Tusass Plus-innut akiliisinnaanngikkuma qanoq iliussaanga?

Akiliisimanngikkuit sianersinnaajunnaassaatit, SMS/MMS-ersinnaajunnaassaatit mobildatamilluunniit atuisinnaajunnaassallutit (Tusass kontut imaqaraluarpalluunniit). Taamaattoq suli ajornartoornermi sianersinnaavutit imaluunniit normunut akeqanngitsumik sianerfiusinnaasunut  sianersinnaallutit (soorlu Atuisunut Sullissivimmut, napparsimavimmut).

Tusass Plus-imik atusuuffiit mikinerulertinniarukku imaluunniit Tusass-inngortinniarukku, allannguinerit ingerlaannaq atuutilernavianngilaq - allannguineq atugassarititatut isumaqatigiissutit malillugit pissaaq.

Aamma www.tusass.gl iserfigiuaannarsinnaavat atuisuunerit allanngortinniarukku, aningaasanik ikisiniaruit imaluunniit kreditkortinnut paasissutissat allanngortinniarukkit.